– Det er me som er barn som skal leva lengst på Stord. Me håpar derfor at me blir høyrt på når kommunen skal bestemma over framtida vår! seier leiarane i Miljøagentane på Stord, Malene Ruhs Langåker (11) og Nora Elise Hauan (11).
Miljøagentane på Stord hadde eit møte på Stord folkebibliotek i august der miljøagentane snakka om korleis me kan få ei grøn framtid på Stord – og kva kommunen bør ha med i kommuneplanen fram til 2040.
For at sentrum skal bli ein endå kjekkare, finare og betre plass å vera, føreslår miljøagentane mellom anna å planta fleire tre, blomar og planter – og få fleire leikeplassar og klartrepark mellom trea. Miljøagentane vil òg opna for å dyrka mat fleire stader i sentrum, og ha loppemarknad og fleire bossplukkedagar.
Miljøagentane føreslår fleire klimatiltak, mellom anna at kommunen arbeider for å få tog og trikk til Stord og byggjer fleire sykkelvegar. Barna har ei klar oppmoding:
– Snøen er kjempekjekk å vera i, og me må gjera det me kan for å få snø i framtida også!
Her er nokre av dei andre tiltaka Miljøagentane går inn for:
• ikkje bygg motorveg gjennom Landåsen, Skjepåsen/Skiphaugsvatnet, og ikkje øydelegg naturen og dei fine badevatna våre.
• billegare buss for alle, og gratis for barn under 10 år.
• bygga fleire sykkelstiar
• skulehage på alle skular
• satsa på vindmøller på havet
Sjå heile lista!
